ناوه‌ڕۆك
ناساندن
چۆن لە ڕێگەی گۆرانییەوە فێری زمان ببین؟ (بە ئینگلیزی: how to learn language through songs، بە عەرەبی: كيف تتعلم اللغة من الأغنية) چەندین ڕێگا هەیە بۆ فێربوونی زمانەکان، یەکێک لە ڕێگا ئاسان و چێژبەخشەکان گوێگرتنە لە گۆرانی، بەتایبەتی بۆ ئەو کەسانەی ئاستی سەرەتایین لەو زمانەی کە دەیانەوێت فێری ببن.
بۆچی ئەم ڕێگایە باشە؟
گۆرانی و میوزیک بەشێکن لە ژیانی ڕۆژانەی زۆرینەمان، هەر کاتێک بمانەوێت دەتوانین گوێ لە گۆرانی بگرین لەسەر کار، لە ئۆتۆمبێلدا، لەماڵەوە یاخود هەر کاتێکی تر بمانەوێت و پێویست ناکات کات و شوێنی تایبەتی بۆ دیاری بکەین، کاتێکی زۆر بەسەر نابەیت، کاتی هەر گۆرانییەک دەگاتە نزیکەی ٥ خولەک، گوێگرتن لە گۆرانی کارێکی بێزارکەر نییە و بە پێچەوانەوە بۆ هەندێک کەس خولیایەکە، وشە و ڕستە و دەستەواژەکان لە گۆرانییەکدا چەند جارێک دووبارە دەبنەوە و بەم شێوەیە زوتر فێریان دەبیت و لەبیرت ناچنەوە، وشە و ڕستەی ناو گۆرانی ئاسانترن بۆ لەبەرکردن بەهۆی ئەو میلۆدییەی کە هەیەتی، گوێگرتن لە گۆرانی توانای تێگەیشتن و گوێگرتنت بۆ ئەو زمانە باشتر دەکات و فێری شێوازی دەربڕینی دروستی وشەکان و ڕستەکان دەبیت، هەروەها گۆرانی و میوزیک زیاتر ئاشنات دەکات بە کلتوری ئەو نەتەوەیەی دەتەوێت فێری زمانەکەی ببیت، کە ئەمەش شتێکی باشە چونکە لەکاتی فێربوونی زماندا دەبێت ڕەچاوی شێوازی قسەکردن و کلتورەکەشیان بکەیت.
چۆن لە گۆرانییەوە فێری زمان ببین؟
سەرەتا کاتێک دەمانەوێت دەست بکەین بە فێربوونی زمانێک لە ڕێگەی گۆرانییەوە، دەبێت بەدوای گۆرانی بگەڕێیت لەو ژانەرەی زیاتر حەزت پێیەتی و گوێی لێدەگریت، چونکە کاتێک چێژ وەرنەگریت لە گۆرانییەکە تاقەتت نابێت زۆر دووبارەی بکەیتەوە و کلیلی فێربوونی زمان لە گۆرانییەوە زۆر دووبارەکردنەوەیەتی، تێبینییەکی دیکە لەکاتی هەڵبژاردنی گۆرانی ئەوەیە کە بزانیت ئایا ئەو گۆرانییە لە ئاستی فێربوونی تۆدایە، ئەگەر گۆرانییە هەڵبژێریت کە واتا و دەربڕینی هەموو وشەکانی بزانیت ئەوا سوودێکی زۆری لێ نابینیت، هەروەها ئەگەر ئاستێکی سەرەتایت هەبێت و گوێ لە گۆرانی کلاسیک یاخود هیپ هۆپ و ڕاپ بگریت بەهەمان شێوە سوودێکی زۆری لێ نابینیت، چونکە گۆرانی کلاسیک وشەی ئەنتیکی و کلتووریی تێدا بەکاردێت کە لەوانەیە قورس بێت بۆت و هەندێک گۆرانی هیپ هۆپ و ڕاپیش هێندە خێران کە لەوانەیە ئەو کەسانەی زمانی دایکیشیانە لێی تێنەگەن، بۆیە باشترین شت ئەوەیە کۆمەڵێک گۆرانی هەڵبژێرە کە لە ئاست و ژانەری تۆیە.
دواتر جارێک گوێ لە گۆرانییەکە بگرە بەبێ سەیرکردنی دەق و ژێرنووسەکەی و بزانە چەنێک لێی تێدەگەیت، ئەمە بۆ باشبوونی توانای گوێگرتن، دوای ئەوە بە ژێرنووس گوێ لە دەقی گۆرانییەکە بگرە و ئەو وشانەی نایانزانیت واتاکانیان و دەربڕینەکانیان فێرببە و لە دەفتەرێکی تێبینی بیاننووسەوە و زوو زوو پێداچونەوەی پێدا بکەروە، یان لەسەر وەرەقەیەک بیاننووسە و لە شوێنێک هەڵیبواسە کە لەبەرچاودا بێت.
گۆرانییەکە بکە بە چەند بەشێکەوە بۆ ئەوەی شێوازی فێربوونەکەت ئاسانتر بکەیت کە واتا و دەربڕینی هەموو وشە و دەستەواژەکانیت زانی، لەگەڵ دەقەکەدا ئەو بەشە بڵێرەوە تا بەتەواوی فێری دەبیت و بۆ بەشەکانی دواتریش بە هەمان شێوە.
پاشان گۆرانییەکە دابگرە لەناو مۆبایلەکەت (واتا داونلۆدی بکە) بۆ ئەوەی هەرکاتێک ویستت بەشێوەیەکی ئاسانتر بەردەست بێت. ڕۆژانە یان هەر کاتێک کاتت هەبوو گوێ لە گۆرانییەکە بگرەوە و لەگەڵ دەقەکەدا گۆرانییەکە بڵێرەوە، تا وای لێدێت بەتەواوی وشە و دەستەواژەکان لەبەر دەکەیت و لەبیرت ناچنەوە.
